[Fresh & Green] 清新

 呢度個佈置係用「海」做主題，出面仲有個露台，種咗好多綠色植物。

南瓜湯幾清甜，沙律係用佢哋自己種嘅水耕生菜，加埋芝麻醬，食落酸酸哋，都唔錯。

香草烤雞胸漢堡，麵包夾住雞胸、生菜、洋葱、番茄同芝士，食落有一陣陣香草味。薯角唔似係用油炸，不過都幾好味。佢哋仲跟咗一細份酸菜，感覺無咁漏。

[大力棒棒摩登中菜] OK，份量唔多

同朋友去大力棒棒摩登中菜食晚餐，本身已經訂咗檯，不過都要晌門口等好耐先入得去。

呢度啲菜式名都幾得意，我哋每人揀咗一款。

 晾衫白肉，差唔多張張檯都有叫，個賣相又真係幾有趣嘅，好似人哋晾衫咁。食起上嚟白肉冇味，要蘸埋辣油食先得。

 七味脆西施，即係加咗七味粉嘅炸豆腐，外皮脆、入面嫩滑。

 飽受折磨，呢個名真係好正，完全估唔到係咩，實物嚟到先知原來係炸金菇。都真係幾佩服佢哋嘅創意，將本來好普通嘅菜式包裝到好特別咁，食落有啲似台灣嘅鹽酥菇。

 川式回鍋肉，雖然話係辣，不過對於食得辣嘅人嚟講只係啱啱夠喉。

 士多啤梨酸甜骨，每個酸甜骨上面都蘸咗士多啤梨醬，有少少似平時食嘅菠蘿咕嚕肉，酸酸甜甜咁。

 麻辣皇帝雞煲，呢個雞煲可以加錢轉蒜蓉牛油多士盒，咁樣食雞煲都係第一次。入面全部雞都係啖啖肉冇骨，個麻辣醬汁都幾香同辣，仲可以用個多士嚟蘸汁食，食落都幾惹味。

芝麻吊燒企鵝雞，我諗因為插住咁上檯，所以就叫企鵝雞，係要預訂先有得食架。一出場就成為咗大家嘅焦點，金色紳士帽、士多啤梨眼，個樣搞笑得嚟又有少少恐怖，好似俾人行私刑咁。

影咗陣相，侍應就拎隻雞返廚房斬件。嗰日隻雞個皮都算脆，仲可以夾埋底下啲烘麵包皮一齊食。

同好多精緻中菜館一樣，每款食物份量唔多，都係每人夾一兩件就食晒。我哋去嗰日有一個類似最低消費嘅規條，係一定要按人頭計咁叫返應相數量嘅飲品，就算好似我哋叫咗咁多嘢食都要叫飲品，好似好少餐廳會有呢種做法。

[Coffee Green Tea] 中規中矩

洛神花茶，可以加少少蜜糖嚟飲，酸酸哋都幾消滯。

蒜香菠菜三文魚意粉，意粉煮得啱啱好，蒜蓉菠菜醬有少少似平時食嘅青醬，另外仲有煙三文魚同磨菇。

嘢食唔算特別好食，中規中矩，不過靜靜哋都OK。

[Doodie Cafe Bar] 唔算特別，但唔係hea

呢晚同朋友嚟到荃灣嘅Doodie Cafe Bar，兩個人分別叫咗：

番茄salsa醬熱狗（$48），個醬整得有啲怪，有少少泰菜feel，但又唔係話難食，只係唔算討好。

小食拼盤（$58），即係德國香草豬肉腸、芝士豬肉腸拼啤酒薯條。啲腸係切開一片片上，食起上嚟都幾方便。薯條係用啤酒炸漿炸，外皮脆口，入面就保留咗薯仔本身嗰種質感。

炸魷魚圈（$88），額外有個他他醬跟埋一齊食，都OK。

 我哋兩個另外叫咗支啤酒（$60）同Mojito（$70），Mojito啲薄荷同青檸嘅味道唔係好出，一般般。

唔知係唔係我哋兩個揀嘅嘢唔係好啱，感覺上唔算特別，不過都睇得出係花過心機，唔係hea嗰種嚟嘅。

[錦榮餐廳] 芝士下午茶

去葵涌廣場買衫，search咗附近有咩食，被錦榮餐廳啲拉絲芝士吸引咗，咁就順便去食個下午茶。

都係一貫港式茶餐廳格局，燈光充足、裝修簡潔。下午茶餐除咗有三文治、多士外，仲有炒粉麵等等，定價$28至$30不等，包一杯熱飲，都算合理。

我呢次係為咗芝士而嚟，原本想叫芝士肉醬焗通心粉，不過怕食得太飽，見有芝士肉醬焗多士（$28），就轉軚要佢。

厚多士塗滿番茄肉醬同碎芝士，再入爐焗脆，當日嘅芝士拉絲效果唔明顯，好彩芝士份量多，完全滿足到我呢個芝士控。唯一要彈係番茄肉醬質感比較濕，令到麵包變得腍身，味精濃度亦唔輕，食完都幾口渴。

熱奶茶，茶味稍淡，不過整體都幾順滑嘅。

芝士比例慷慨，以定價廿幾三十蚊嘅港式下午茶嚟講，都已經算叫有誠意。

[津津有味] 彩虹雞蛋仔

去咗天水圍同家人食飯，好耐都冇去新北江呢頭喇，晌IG留意咗津津有味啲雞蛋仔好耐，就趁機買嚟食吓。

四色星星雞蛋仔，清楚見到紫、綠、紅同啡四種顏色，分別代表香芋、蜜瓜、士多啤梨同朱古力四隻口味，除咗後三款之外，香芋嗰款係完全食唔出有香芋味，另外嘅就係人工化香料味（尤其係蜜瓜），不過食得呢類色彩繽紛嘢都預咗。

大部份雞蛋仔入面都釀咗粒蜜糖星星，食起嚟脆卜卜。

整體嚟講偏硬，唔算好好食，但都幾得意過癮。