[串酒里] 後巷串燒

呢晚去咗山林道，試試位於後巷嘅串酒里。



身處尖沙咀同佐敦之間，走入嚟之後有啲尋幽探秘嘅感覺。



除咗戶外位，仲有室內位。



英倫圖案碟同LEGO叉，有啲似小朋友餐具，好得意。



餐牌其中一頁印住周星馳嘅電影明句，做人無夢想，同條鹹魚有乜分別？



另外仲有張紙，詳列咗各款串燒。圖片只供參考，除非特別標明份量，否則就係以一串或一份做單位。



佢哋仲有獨家嘅廣東話粗口手工啤酒，唔同單字代表唔同口味，非常有特色。



香甜蜜糖同香檸薄荷好似幾啱心水，可惜店員話賣晒，於是試咗煙燻黑棗同甜橘微辣，前者甘甜有棗香，後者就輕微辛口。



招紙背面仲印咗粗口單字嘅字意，幾有心思。



檯上面仲放咗黑椒碎、七味粉同辣椒粉，串燒本身已經有調味，我覺得唔駛額外再加都夠味。



鹽燒厚切牛舌，牛舌切得比較大件，表面灑咗鹽同黑椒，食落爽口。鹽燒安格斯牛柳粒，幾有牛味同嚼勁。



黑松露燒扇貝，蒜蓉將扇貝徹底淹沒，口感彈牙，黑松露又唔會過份濃郁。



日本雞蛋燒廣島蠔，第一次試呢種配搭，蠔肉creamy，雞蛋蛋汁令整體更滑溜，紅色醬汁就有啲甜甜辣辣。



秘制汁燒鮑魚，鮑魚爽彈唔韌，秘制汁微甜惹味，仲有少少黑椒提味。



黑松露燒八吋虎蝦，拎嚟時傳嚟陣陣蝦殻香，虎蝦大隻肉厚，黑松露幾多又香口。芝士燒八吋虎蝦，以為芝士係可以拉絲嗰種，實際係用芝士粉調味，相對起黑松露嚟講味道就唔算突出。



蒜蓉燒原條茄子，茄子開邊成三角形咁，上面鋪滿蒜蓉同木魚碎，可以輕易咁用隻叉撕出一絲絲茄子肉嚟食，軟綿多汁又香甜。



鹽燒日本秋葵，秋葵外皮香脆，內層爽滑，但無平日滑潺潺嘅口感，較易令人接受。



芝士煙肉焗大啡菇，大啡菇上面釀咗芝士同煙肉，配搭穩陣又美味。

[Moshi Moshi] 尖沙咀日式丼

呢間Moshi Moshi樓下只有一張四人檯，側邊就有條樓梯。



走上去就有大約三十幾個位，店舖面積唔大，不過以香港呢個彈丸之地嚟講就係平常事。



最入係半開放式廚房，環境雖小，但總算四正。



今次試咗幾樣嘢，先嚟嘅係章紅芥末沙律，章紅魚刺身切得薄薄，既有咬口又有魚香。



淋上酸酸嘅柚子醋，當中仲有微量芥末，加埋一齊食幾醒胃。



海膽甜蝦油甘魚丼，實物賣相唔錯。



鋪面嘅刺身有海膽、甜蝦同油甘魚，海膽有三大瓣，食落甘甜。甜蝦嘅size都唔細，口感脆身。油甘魚切得厚薄啱啱好，肥美爽滑。底下嘅米飯微暖有醋香，都幾軟糯。



佢哋嘅串燒係即叫即燒，所以都等咗幾耐。海膽芝士蘑菇串，第一次試呢個配搭嘅串燒，海膽同芝士燒到半溶，下層嘅蘑菇juicy，感覺唔錯。



香草薄荷梳打，杯入面有幾片薄荷葉，同埋仲有罐頭雜果，飲落有薄荷清香兼爽喉。

[EAT ME] 人氣旺

嚟到旺角嘅EAT ME Bar & Restaurant。



坐咗晌窗邊位，睇住鬧市夜景食晚餐都唔錯。



餐廳有二至四人套餐，最後都係決定散叫，試多幾款自己想食嘅。



某啲散叫菜式可以加$18轉做套餐，包沙律同是日餐湯。當晚嘅沙律入面有巴馬火腿、車厘茄同雜菜，同埋用芝麻醬調味，都幾醒胃。



是日餐湯應該係甘筍忌廉湯，都幾creamy。



燒澳洲T骨牛扒配蒜蓉汁，估唔到仲跟埋意粉。



T骨牛扒揀咗五成熟，切開後橫切面呈淡淡嘅粉紅色，食落軟嫩，近筋位就有油香。意粉彈牙，撈埋蒜蓉汁嘅話就仲好食。伴碟有意大利瓜同四季豆，口感爽脆。



雀巢薄餅，竹炭餅底薄而脆卜卜，有啲似平時嘅餅乾。鋪面嘅芝士焗到微焦，當中仲有蘑菇同黑松露，同埋搽咗番茄醬調味。頂層就放咗鵪鶉蛋、車厘茄同火箭菜，運用想像力嘅話都有少少雀巢效果嘅。香口唔乾身，味道唔錯。



黑松露芝士牛肉漢堡配薯條，賣相可愛。



黑色嘅竹炭麵包鬆軟，不過就只係顏色特別，實際無乜味道。餐牌寫中間嘅牛肉漢堡扒有6.5安士重，實物打得厚身又挺身，質感鬆化有肉汁。夾住番茄、巴馬臣芝士、火箭菜同黑松露，同埋酸酸甜甜嘅醬汁，惹味又平衡，薯條方面就正正常常。



藍蝶花茶，透明玻璃壺入面有好多朵蝶豆花，令到熱水染成天然嘅紫藍色，都幾靚呀。成壺放晌蠟燭台度，咁就可以保持溫暖，加上無添加糖份，飲落順喉舒服，又有啲消滯。

當晚有限用餐時間九十分鐘，走嗰陣門口堆滿等位嘅食客，人氣非常旺呢！

[四季文昌] 火焰海鮮鍋

嚟到呢間四季文昌，由地下走上去，樓梯佈置成書櫃咁，都幾特別。



入面樓底幾高，陳設同一般火鍋店不盡相同，走嘅係新派路線。



細心咁睇原來地磚印咗唔同花紋，仲有店名射燈做裝飾。



餐牌用手繪圖案做封面，由裝修等等嚟睇，唔知係唔係想吸引多啲年輕人嚟呢？



雖然佢哋嘅椰子雞鍋好馳名，但係睇餐牌個火焰龍蝦海鮮鍋好似更有睇頭，咁就試一試。

鍋入面有原隻切件龍蝦、蚌同青口等海鮮，底下就有唔同嘅蔬菜例如係青皮南瓜、番茄、洋蔥、蒜蓉等等，店員會炒一炒先，將食材爆香。



之後就點火，等啲火熄晒就加埋龍蝦海鮮湯嚟煮，大約五分鐘就食得。

我先飲一啖湯，味道鮮甜，而且愈煮愈濃。



海鮮方面蚌肉厚身、龍蝦嫩滑，當中嘅青皮南瓜亦都幾爽甜。



我哋仲叫多幾款火鍋料嚟試，呢碟係紐西蘭雪花肥牛，肥脂分佈算平均唔過多，質感比較有嚼勁。



安格斯牛小排，相對起嚟油花就仲均勻。



口感軟嫩，我自己都幾鍾意。



佐賀A5牛肉眼，大大一片幾有派頭，同埋切得薄身，用筷子夾起放入鍋度輕輕淥一淥就得。入口咬幾咬即化，食起嚟鬆化牛味出眾。



南極小企鵝，小企鵝好似晌冰上玩緊咁，賣相可愛。叫呢個純粹貪過癮，所以都無太大期望，成品打得挺實，咬起嚟都幾有墨魚香。



日本產地直送野菜籃，一籃已經包括海鮮菇、車厘茄、小松菜、娃娃菜等等，當中以雙色蘿蔔比較少見。



食火鍋難免會有少少熱氣，於是試咗兩款飲品。餐牌詳細列出cocktail嘅成份，呢款Mojito入面有冧酒、青檸、薄荷葉、糖水同梳打水，青檸同薄荷葉味道突出，清新得嚟酒味唔會過份濃郁，對女仔嚟講都唔錯。



Rainbow用咗伏特加、紅石榴糖水、橙汁、菠蘿汁同藍橙皮酒調成，外觀就好似彩虹咁七彩繽紛，味道有唔同層次。