[The Joomak] 韓式素炸雞?

得知佢哋最近推出咗韓式素菜，呢日就嚟試試。聽講呢個素食系列入面嘅食材係同肉類分開處理，對於因為某啲原因而要食全素嘅人嚟講可謂照顧周到。

雖然我唔係素食者，但偶爾都會特登食多啲蔬菜，感覺好似健康啲咁。

嶺峰狀態，餐牌寫係羽衣甘藍加鮮菠蘿、薄荷葉同意大利Panna礦泉水混合打碎而成嘅飲品，上面就用咗杞子同韓薑做裝飾。呢款飲品有1.0、2.0同3.0三種選擇，代表羽衣甘藍嘅含量，1.0係最輕，3.0係最濃。

呢次我哋分別叫咗1.0同3.0，前者嘅味道輕巧，當中有微酸嘅菠蘿味，對一般人嚟講較易接受。後者就草香味突出，薄荷葉令佢更加清爽。飲品入面有大量打碎咗嘅羽衣甘藍，入口卻軟綿，飲落順喉又唔甜，對於注重健康人士嚟講感覺唔錯。

我對呢份韓式甜辣素炸雞都幾期待，實物用杏仁片、青瓜絲、黑白芝麻同紫牛油生菜伴碟，賣相幾吸引。

到底素炸雞會係乜嘢樣？將佢咬開之後發現原來係用豆卜包住素肉炸成，外微脆入面又有啲肉汁，的確好似晌度食緊雞肉咁。外層沾滿甜甜辣辣嘅韓式甜辣醬，加上伴碟嘅食材，整體既有咬口又惹味，差啲唔記得咗佢其實係素食嚟。

除咗素食，我哋仲試咗其他嘢。



韓式牛肉炒粉絲，一向鍾意韓式粉絲嘅彈牙口感，加埋牛肉片、香菇絲同洋蔥絲等等炒成，同埋用豆苗點綴，鹹甜味足，又唔會太重負擔。

紫菜三文魚拌飯，拎到嚟嗰陣只係見到一大堆紫菜絲，帶上一併送嚟嘅膠手套後，用雙手翻幾翻，就見到入面原來仲有三文魚鬆、漬蘿蔔碎同白芝麻等等。



自己將所有材料撈勻嗰陣，雙手仍然感到米飯嘅溫度，同埋傳嚟陣陣麻油香，之後就將佢搓成一個個小小嘅飯糰，咁樣DIY都幾好玩有趣。