呢晚去咗尖沙咀，試試韓國街入面嘅OPPA Coffee Bar Restaurant。
工業風嘅裝修，樓底都幾高。
餐牌入面嘅菜式雖然唔算多。
但大部份都係港人鍾意嘅嘢，其中就以芝士系列最吸引。
我哋叫咗幾樣嘢嚟試，左邊嗰支係蜜桃紅莓果酒，原本係想試荔枝啤梨嗰款，可惜啱啱好無貨。不過呢款飲起上嚟酸酸甜甜，無晌度飲酒嘅感覺，味道討好。
三色韓國煎餅，每片煎餅都大約係兩三口大小，煎得外層微脆內層軟綿，南瓜煎餅清甜、泡菜煎餅甜辣、蔥煎餅惹味，點埋醬汁食都唔錯。
韓式炒粉絲，粉絲表面有甜甜哋嘅醬汁，口感煙煙韌韌，入面仲有切絲彩椒、甘筍、洋蔥、魚糕、蔥花、白芝麻等等，食起上嚟幾爽脆。
章魚流心芝士小丸子，店員分別將用嚟整小丸子嘅食材、小丸子烤盤同氣體爐拎嚟，俾我哋自己DIY。
最大嗰個量杯入面有紫菜絲、蔥花、章魚粒同韓式炒飯，根據說明書嘅指示，先將芝士絲倒入大量杯度。
之後用餐具將大量杯嘅食材撈勻。
小丸子烤盤本身已經掃咗層油，咁就開爐等佢燒熱。
將適量嘅芝士炒飯加入去。
再倒埋牛奶蛋漿。
等蛋漿半熟嗰陣就用竹籤反轉小丸子，按個人喜好將另一邊燒到半熟或全熟就得。
雖然芝士唔係流心，不過食材配搭穩陣，微辣有咬口，加上係自己整嘅，唔多唔少都會有啲同情分。
（附上影片，openrice要電腦桌面版先可以睇到）
沒有留言:
張貼留言